Учим ирмосные гласы

Твоя́ победи́тельная десни́ца / Боголе́пно в кре́пости просла́вися: / та бо, Безсме́ртне, / я́ко всемогу́щая проти́вныя сотре́, / изра́ильтяном путь глубины́ новосоде́лавшая. Видео-иллюстрация (нажмите)

Христо́с во гра́де Вифлее́мсте младе́нствует, / на́ше, я́ко Благоутро́бен, обновля́я естество́. / Усе́рдно прииди́те, земноро́днии, / се́рдцем песнь сладкопе́сненную воспои́м Влады́це во ве́ки: / сла́вно бо просла́вися. Видео-иллюстрация (нажмите)

В Рождество Христово:

Христо́с ражда́ется – сла́вите! / Христо́с с Небе́с – сря́щите! / Христо́с на земли́ – возноси́теся! / По́йте Го́сподеви, вся земля́, / и весе́лием воспо́йте, лю́дие, я́ко просла́вися. Видео-иллюстрация (нажмите)

Спасе́ лю́ди чудоде́йствуяй Влады́ка, / мо́крую мо́ря во́лну оземлени́в дре́вле; / во́лею же ро́ждься от Де́вы, / стезю́ прохо́дну Небесе́ полага́ет нам. / Его́же, по Существу́ ра́вна же Отцу́ и челове́ком, сла́вим. Видео-иллюстрация (нажмите)

В поклонение Честнаго Креста:

Боже́ственнейший прообрази́ дре́вле Моисе́й, / в Чермне́м мо́ри прове́д Изра́иля Кресто́м Твои́м, / во́ду жезло́м пресе́к, / песнь Тебе́ исхо́дную / воспева́я, Христе́ Бо́же. Видео-иллюстрация (нажмите)

Во Святую Пасху:

Воскресе́ния день, просвети́мся, лю́дие, / Па́сха, Госпо́дня Па́сха: / от сме́рти бо к Жи́зни и от земли́ к Небеси́ Христо́с Бог нас преведе́, побе́дную пою́щия. Видео-иллюстрация (нажмите)

В неделю Фомы:

Пои́м, вси лю́дие, от го́рькия рабо́ты фарао́ни Изра́иля Изме́ншему / и во глубине́ морсте́й нога́ми немо́крыми Наста́вльшему / песнь побе́дную, я́ко про сла́вися. Видео-иллюстрация (нажмите)

Во Успение Богородицы:

Преукраше́нная Боже́ственною сла́вою, / свяще́нная и сла́вная, Де́во, па́мять Твоя́ / вся собра́ к весе́лию ве́рныя, / начина́ющей Мариа́ме с ли́ки и тимпа́ны / Твоему́́ пою́щия Единоро́дному: сла́вно я́ко просла́вися. Видео-иллюстрация (нажмите)

Осмогласника и Введения:

Песнь побе́дную пои́м вси Бо́гу, / сотво́ршему ди́вная чудеса́ мы́шцею высо́кою / и спа́сшему Изра́иля, я́ко просла́вися. Видео-иллюстрация (нажмите)

Пои́м Го́сподеви песнь но́вую, / непроходи́мое бо оземлени́в Чермно́е, / пешеше́ствовати сотвори́ сыно́м Изра́илевым, / и сопроти́вныя враги́ покры́ мо́ре. Видео-иллюстрация (нажмите)

Похвалу́ Богови́дец Моисе́й Изра́илю предвозглаша́ет, / начина́ет же Мариа́м прему́дрым же на́м, / песнь побе́дную Изба́вителю Бо́гу вси воспои́м. Видео-иллюстрация (нажмите)

Столпо́м о́гненным и о́блачным Изра́иля наставле́й я́ко Бог / мо́ре разве́рже, колесни́цы же фарао́новы глубино́ю покры́, / пои́м песнь побе́дную, я́ко Еди́н просла́вися. Видео-иллюстрация (нажмите)

Го́рькия рабо́ты изба́влься Изра́иль, / непроходи́мое про́йде, я́ко су́шу, / врага́ зря потопля́ема, песнь я́ко Благоде́телю пое́т Бо́гу, / чудоде́ющему мы́шцею высо́кою, я́ко просла́вися. Видео-иллюстрация (нажмите)

Пои́м песнь но́вую Бо́гу, / от рабо́ты фарао́новы изба́вльшему сы́ны Изра́илевы / и в пусты́ни ты́я препита́вшему, я́ко сла́вно просла́вися. Видео-иллюстрация (нажмите)

Фарао́на с колесни́цами в мо́ри Христо́с потопи́ / и наста́ви лю́ди, пою́щия и глаго́лющия: / пои́м Го́сподеви, сла́вно бо просла́вися. Видео-иллюстрация (нажмите)

Вознесу́ Тя, Бо́же, Спа́се мой, / я́ко воскре́сл еси́ от ме́ртвых, / попра́в смерть. Видео-иллюстрация (нажмите)

Го́сподеви пои́м побе́дную песнь, / во исхо́де Изра́илеве из Еги́пта / Чермна́го мо́ря и Иорда́на струи́ огусти́вшему, / Еди́ному пресла́вно, лю́дем, пешеше́ствующим посреде́ его́, / сла́вно бо просла́вися. Видео-иллюстрация (нажмите)

Помо́гшему Бо́гу во Еги́пте Моисе́ови / и тем фарао́на со всево́инством погрузи́вшему, / побе́дную песнь пои́м, я́ко просла́вися. Видео-иллюстрация (нажмите)

Песнь 2

Вонми́, Не́бо, и возглаго́лю, / я́ко Сло́во О́тчее во́лею сни́де на зе́млю, / приклони́в Небеса́, и бысть Челове́к, / да челове́ка спасе́т, я́ко Человеколю́бец. Видео-иллюстрация (нажмите)

Вонми́ гла́су моему́, от Де́вы Рожде́йся, / и глаго́лы моя́ внуши́, / я́ко И́мя Твое́ ди́вное, Го́споди, призва́х. Видео-иллюстрация (нажмите)

Вонми́, Не́бо, и слы́ши, земле́, / и Христа́ воспо́й, пелена́ми обви́таго / и вери́ги прегреше́ний мои́х разреши́вшаго. Видео-иллюстрация (нажмите)

Вонми́ Не́бо, и возглаго́лю, / и да слы́шит земля́ глаго́лы уст мои́х: / я́ко И́мя Твое́, Го́споди, призва́х. Видео-иллюстрация (нажмите)

Вонми́, Не́бо, и возглаго́лю, / и воспою́ Христа́, Спа́са ми́рови, / еди́наго Человеколю́бца. Видео-иллюстрация (нажмите)

Вонми́ гла́су моле́ния моего́, Царю́ мой и Бо́же мой, / пе́сненно Тебе́ вопию́, / я́ко к Тебе́ помолю́ся, Го́споди, и спаси́ мя. Видео-иллюстрация (нажмите)

Ви́дите, ви́дите, я́ко Бог Аз есмь, / порабоще́нныя лю́ди Изра́илевы / Моисе́ю народоводи́ти в пусты́ни повеле́вый / и спасы́й, я́ко си́лен, / вла́стию Мое́ю. Видео-иллюстрация (нажмите)

Ви́дите, ви́дите, я́ко Аз есмь Спас ми́ра, / Свет И́стинный, Исто́чник жи́зни, / Сын Бо́жий. Видео-иллюстрация (нажмите)

Песнь 3

Еди́не, ве́дый челове́ческаго существа́ не́мощь / и ми́лостивно в не вообра́жся, / препоя́ши мя с высоты́ си́лою, / е́же вопи́ти Тебе́, Святы́й, / одушевле́нный хра́ме неизрече́нныя сла́вы Твоея́, Человеколю́бче. Видео-иллюстрация (нажмите)

Высокоца́рствуяй Безнача́льне, / ми́лостиве Сло́ве, при́зри, вонми́ ми,– / слезоточа́щая приле́жно вопия́ше Ти дре́вле А́нна; / но я́ко о́ную услы́шал еси́ рыда́ющую, / и на́ша утверди́ мы́сли, Царю́, досто́йно пе́ти Твое́ Рождество́. Видео-иллюстрация (нажмите)

В Рождество Христово:

Пре́жде век от Отца́ рожде́нному нетле́нно Сы́ну / и в после́дняя от Де́вы воплоще́нному безсе́менно, / Христу́ Бо́гу возопии́м: вознесы́й рог наш, Свят еси́, Го́споди. Видео-иллюстрация (нажмите)

При́зри на пе́ния рабо́в, Благоде́телю, / врага́ смиря́я вознесе́нную горды́ню, / нося́й же, Всеви́дче, греха́ превы́шше / непоколе́блемо утвержде́ныя, Бла́же, певцы́ / основа́нием ве́ры. Видео-иллюстрация (нажмите)

Честнаго Креста:

Утверди́, Влады́ко Христе́, Кресто́м на ка́мени мя ве́ры, / не поколеба́тися уму́ прило́ги врага́ зла́го, / Еди́н бо еси́ Свят. Видео-иллюстрация (нажмите)

Пасхи:

Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник, / из гро́ба одожди́вша Христа́, / в Не́мже утвержда́емся. Видео-иллюстрация (нажмите)

Фомы:

Утверди́ мене́, Христе́, на недви́жимом ка́мени за́поведей Твои́х / и просвети́ мя све́том лица́ Твоего́: / несть бо свят, па́че Тебе́, / Человеколю́бче. Видео-иллюстрация (нажмите)

Успения Богородицы:

Соде́тельная и содержи́тельная всех Бо́жия му́дросте и си́ло, / непрекло́нну, недви́жиму Це́рковь утверди́, Христе́, / Еди́н бо еси́ Свят, во святы́х почива́яй. Видео-иллюстрация (нажмите)

Осмогласника:

Ка́мень, его́же небрего́ша зи́ждущии, / сей бысть во главу́ у́гла: / той есть Ка́мень, на не́мже утверди́ Це́рковь Христо́с, / ю́же от язы́к искупи́. Видео-иллюстрация (нажмите)

Утвержде́й сло́вом Небеса́ и зе́млю основа́вый, Бо́же, / и мене́ утверди́, вопию́ща Тебе́ песнь: / Свят еси́, Го́споди. Видео-иллюстрация (нажмите)

Пре́жде зача́тия честна́го Саму́ила несумне́н но Бо́гу обеща́вши, / священнома́ти А́нна ны́не, ра́дующися, пое́т с на́ми: / утверди́ся в Го́споде се́рдце мое́. Видео-иллюстрация (нажмите)

Не му́дростию и бога́тством да хва́лится сме́ртный свои́м, / но ве́рою Госпо́днею, правосла́вно взыва́я Христу́ Бо́гу и поя́ при́сно: / на ка́мени Твои́х за́поведей утверди́ мя, Влады́ко. Видео-иллюстрация (нажмите)

Введения:

Да утверди́тся се́рдце мое́ в во́ли Твое́й, Христе́ Бо́же, / И́же над вода́ми не́бо утвержде́й второ́е / и основа́вый на вода́х зе́млю, Всеси́льне. Видео-иллюстрация (нажмите)

Утверди́, Го́споди, Це́рковь Твою́, / ю́же стяжа́л еси́ си́лою Креста́ Твоего́, / и́мже врага́ победи́л еси́ и просвети́л еси́ вселе́нную. Видео-иллюстрация (нажмите)

Утвержде́ние ми бу́ди, / основа́вый зе́млю на вода́х, / я́ко несть свят, па́че Тебе́, Го́споди. Видео-иллюстрация (нажмите)

Утвержде́й сло́вом Твои́м вселе́нную, / я́же не подви́жится, / утверди́ и на́шу мысль в страх Твой, Влады́ко Го́споди. Видео-иллюстрация (нажмите)

Да утверди́тся се́рдце мое́ наде́ждею, Христе́, благ Твои́х, / да непреста́нно с пе́снию пе́ние взыва́ю Ти, / и́бо несть свят, па́че Тебе́, Человеколю́бче. Видео-иллюстрация (нажмите)

Песнь 4

Го́ру Тя, благода́тию Бо́жиею приосене́нную, / прозорли́выма Авваку́м усмотри́в очи́ма, / из Тебе́ изы́ти Изра́илеву провозглаша́ше Свято́му / во спасе́ние на́ше и обновле́ние. Видео-иллюстрация (нажмите)

Услы́шав проро́к, Христе́, слух Твой, убоя́ся, / я́ко и́маши от Де́вы пройти́, / и возопи́ тре́петом: сла́ва си́ле Твое́й, Го́споди. Видео-иллюстрация (нажмите)

В Рождество Христово:

Жезл из ко́рене Иессе́ова и цвет от него́, Христе́, / от Де́вы прозя́бл еси́, из горы́, Хва́льный, / приосене́нныя ча́щи прише́л еси́, вопло́щся / от Неискусому́жныя, Невеще́ственный и Бо́же. / Сла́ва си́ле Твое́й, Го́споди. Видео-иллюстрация (нажмите)

Ро́да челове́ча обновле́ние / дре́вле, поя́, проро́к Авваку́м предвозвеща́ет, / ви́дети неизрече́нно сподо́бився о́браз: / млады́й Младе́нец бо из горы́ – Де́вы, изы́де / люде́й во обновле́ние, Сло́во. Видео-иллюстрация (нажмите)

Честнаго Креста:

На Кресте́ Тя, Си́льне, свети́ло вели́кое ви́дев, / тре́петом взя́тся, лучи́ сопря́тав, скры. / Вся же тварь воспе́ со стра́хом Твое́ долготерпе́ние, / и́бо испо́лнися земля́ Твоего́ хвале́ния. Видео-иллюстрация (нажмите)

Пасхи:

На Боже́ственней стра́жи Богоглаго́ливый Авваку́м / да ста́нет с на́ми и пока́жет светоно́сна А́нгела, я́сно глаго́люща: / днесь спасе́ние ми́ру, я́ко воскре́се Христо́с, / я́ко всеси́лен. Видео-иллюстрация (нажмите)

Фомы:

Ве́лия та́йна Твоего́, Христе́, смотре́ния: / сию́ бо свы́ше прови́дя Богозри́тельно, Авваку́м, / изше́л еси́, вопия́ше Тебе́, / во спасе́ние люде́й Твои́х, Человеколю́бче. Видео-иллюстрация (нажмите)

Успения:

Ре́чи проро́ков и гада́ния / воплоще́ние прояви́ша от Де́вы Твое́, Христе́, / сия́ние блиста́ния Твоего́ во свет язы́ков изы́дет, / и возгласи́т Тебе́ бе́здна с весе́лием: / си́ле Твое́й сла́ва, Человеколю́бче. Видео-иллюстрация (нажмите)

Осмогласника и Введения:

Ду́хом прови́дя, проро́че Авваку́ме, Словесе́ воплоще́ние, / пропове́дал еси́, вопия́: / внегда́ прибли́житися ле́том – позна́ешися, / внегда́ приити́ вре́мени – пока́жешися. / Сла́ва си́ле Твое́й, Го́споди. Видео-иллюстрация (нажмите)

Слы́ша дре́вле Авваку́м, Христе́, чу́дный Твой слух и стра́хом взыва́ше: / от ю́га Бог прии́дет и Святы́й от горы́ приосене́нныя ча́щи спасти́ пома́занныя. / Сла́ва си́ле Твое́й, Го́споди. Видео-иллюстрация (нажмите)

Авваку́м, сла́вное Твое́ прише́ствие а́бие, Сло́ве, прови́дя, вопия́ше: / услы́шах, Го́споди, я́ко от горы́ святы́я прии́деши во спасе́ние челове́ков, / и, стра́ха испо́лнь быв, взыва́ет: / я́ко ве́лия дела́, Христе́ мой, Твоея́ сла́вы. Видео-иллюстрация (нажмите)

Слух Твой, Го́споди, услы́шах и убоя́хся, / дела́ Твоя́ разуме́х и ужасо́хся, / я́ко Бог, пре́жде век Сый, от Де́вы рожде́йся, бысть Челове́к. Видео-иллюстрация (нажмите)

С чу́дным ста Авваку́мом на Боже́ственней твое́й стра́жи, Григо́рие, / и, Су́щаго на ра́му Херуви́мску позна́вый, / всеми́рнаго был еси́ возвести́тель спасе́ния, при́сно зовы́й: / сла́ва си́ле Твое́й, Го́споди. Видео-иллюстрация (нажмите)

Взя́тся со́лнце, и луна́ ста в чи́не свое́м, / возне́слся еси́, Долготерпели́ве, на Дре́во / и водрузи́л еси́ на нем Це́рковь Твою́. Видео-иллюстрация (нажмите)

Что вопие́ши ду́хом, рцы, проро́че, / прови́дев, ужасну́лся еси́, Бо́га разуме́в от Де́вы, / соедине́на мне пло́тию, те́мже ужаса́юся. Видео-иллюстрация (нажмите)

Я́ко Бог воплоща́ется, не пострада́в преложе́ния, / Боже́ственный ужасе́ся, услы́шав, Авваку́м / и, е́же в Богове́дение от идолонеи́стовства / разуме́в ве́рных спасе́ние, взыва́ше: / Го́споди, сла́ва си́ле Твое́й. Видео-иллюстрация (нажмите)

Услы́шах, Го́споди, слух Твой и убоя́хся, / разуме́х дела́ Твоя́, – проро́к глаго́лаше, – / и просла́вих си́лу Твою́. Видео-иллюстрация (нажмите)

Возсия́ благода́ть Твоя́ язы́ком, / и ви́деша концы́ сла́ву Твою́, / я́ко Кресто́м Твои́м мир весь спасл еси́. Видео-иллюстрация (нажмите)

Разуме́х, Всеси́льне, Твое́ смотре́ние / и со стра́хом просла́вих Тя, Спа́се. Видео-иллюстрация (нажмите)

Услы́шах, Го́споди, слух Твой и убоя́хся, / я́ко Кресто́м Твои́м мир просвети́л еси́ / и нам дарова́л еси́ Твое́ Воскресе́ние. Видео-иллюстрация (нажмите)

Слух си́лы Твоея́ проро́к Авваку́м услы́шав, убоя́ся, / дела́ Твоя́, Бо́же, разуме́в, ужасе́ся и вопия́ше: / сла́ва си́ле Твое́й, Го́споди. Видео-иллюстрация (нажмите)

Песнь 5

Просвети́вый сия́нием / прише́ствия Твоего́, Христе́, / и освети́вый Кресто́м Твои́м ми́ра концы́, / сердца́ просвети́ све́том Твоего́ Богоразу́мия / правосла́вно пою́щих Тя. Видео-иллюстрация (нажмите)

О Всеви́дче, царе́й сла́во, / кто Твоему́ человеколю́бию земноро́дных не удиви́тся? / на земли́ бо яви́лся еси́, не оста́вль Оте́ческих, / днесь всю обновля́яй тварь / и мир, я́ко еди́н Миронача́льник, подая́й. Видео-иллюстрация (нажмите)

В Рождество Христово:

Бог Сый ми́ра, Оте́ц щедро́т, / Вели́каго Сове́та Твоего́ А́нгела, / мир подава́юща, посла́л еси́ нам; / тем, Богоразу́мия к све́ту наста́вльшеся, / от но́щи у́тренююще, славосло́вим Тя, Человеколю́бче. Видео-иллюстрация (нажмите)

Из но́щи дел омраче́нныя пре́лести / очище́ние нам, Христе́, / бо́дренно ны́не соверша́ющим песнь, я́ко Благоде́телю, / прииди́, подава́яй удо́бну стезю́, / по не́йже востека́юще, обря́щем сла́ву. Видео-иллюстрация (нажмите)

Честнаго Креста:

У́тренююще, Тя воспева́ем, Спа́се Ще́дре, / мир обре́тше Кресто́м Твои́м, / и́мже обнови́л еси́ род челове́ческий, / к Све́ту Невече́рнему вводя́ нас. Видео-иллюстрация (нажмите)

Пасхи:

У́тренюем у́тренюю глубоку́, / и вме́сто ми́ра песнь принесе́м Влады́це, / и Христа́ у́зрим, Пра́вды Со́лнце, / всем жизнь возсия́юща. Видео-иллюстрация (нажмите)

Успения Богородицы:

Бо́жию и неизрече́нную добро́ту / доброде́телей Твои́х, Христе́, испове́м: / от Присносу́щныя бо Сла́вы Соприсносу́щное и Ипоста́сное возсия́вый Сия́ние, / из де́вственныя утро́бы су́щим во тьме и се́ни вопло́щся, / возсия́л еси́, Со́лнце. Видео-иллюстрация (нажмите)

Осмогласника:

Твой мир даждь нам, Сы́не Бо́жий: / ино́го бо, ра́зве Тебе́ бо́га не зна́ем, / И́мя Твое́ имену́ем, / я́ко Бог живы́х и ме́ртвых еси́. Видео-иллюстрация (нажмите)

Фомы:

От но́щи у́тренююще, пое́м Тя, Христе́, / Отцу́ Собезнача́льна и Спа́са душ на́ших, / мир ми́рови пода́ждь, Человеколю́бче. Видео-иллюстрация (нажмите)

Угль горя́щий, и́же до Иса́ииных усте́н Серафи́м приложи́ не́когда, / клеща́ми взем и приложе́н; он же, очище́н быв, /– пра́вде научи́теся, – всем пропове́даше. Видео-иллюстрация (нажмите)

Свет Твой, Го́споди, и и́стину Твою́ низпосли́, / е́же наста́вити нас на повеле́ния Твоя́, и да́руй нам мир Твой, Человеколю́бче. Видео-иллюстрация (нажмите)

Введения:

Све́тлый нам возсия́й Свет Присносу́щный, / у́тренюющим о судьба́х за́поведей Твои́х, / Влады́ко Человеколю́бче, Христе́, Бо́же наш. Видео-иллюстрация (нажмите)

От но́щи у́тренююще, Тебе́ сла́ву возсыла́ем, Го́споди Бо́же наш, / Твой мир даждь нам, / я́ко, ра́зве Тебе́, бо́га ино́го не ве́мы. Видео-иллюстрация (нажмите)

Озари́ наш ум, Бо́же, све́том за́поведей Твои́х / и све́тлостию благода́ти Твоея́, да́руя нам, Бла́же, Твоя́ ми́лости, / зане́ свет и мир повеле́ния Твоя́. Видео-иллюстрация (нажмите)

От но́щи у́тренююще, воспева́ем Тя, Христе́ Бо́же, / обнища́вшаго нас ра́ди / и Крест и смерть пло́тию претерпе́вшаго. Видео-иллюстрация (нажмите)

Свет Твой незаходи́мый возсия́й, Христе́, / в сердца́ ве́рно пою́щих Тя, / мир подава́яй нам па́че ума́; / тем, от но́щи неве́дения ко дню Све́том Твои́м теку́ще, / славосло́вим Тя, Человеколю́бче. Видео-иллюстрация (нажмите)

От но́щи неве́дения просвеще́й концы́, / просвети́ мя у́тром / человеколю́бия Твоего́, Го́споди. Видео-иллюстрация (нажмите)

Я́ко просвеще́ние на́ше сый, Христе́, / просвети́ нас, Защи́тителю жи́зни на́шея, / сохрани́ ны, наде́ющияся на Тя. Видео-иллюстрация (нажмите)

Песнь 6

Обы́де нас после́дняя бе́здна, / несть избавля́яй, / вмени́хомся, я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих и исправле́ние. Видео-иллюстрация (нажмите)

Во глубину́ поги́бели окая́нное естество́, Христе́ мой Спа́се, дости́гшее дре́вле / лежа́ше, – увы́ мне! – в те́мных глубо́ких, / поне́же Твое́ю Боже́ственною си́лою к Небеси́ взы́де, / красне́йшим добро́там, пожру́ Тебе́, Спа́се, вопие́т, / же́ртву хвале́ния. Видео-иллюстрация (нажмите)

В Рождество Христово:

Из утро́бы Ио́ну младе́нца изблева́ морски́й зверь, / якова́ прия́т; / в Де́ву же все́льшееся Сло́во / и плоть прие́мшее про́йде, сохра́ншее нетле́нну: / Его́же бо не пострада́ истле́ния, / Ро́ждшую сохрани́ неврежде́нну. Видео-иллюстрация (нажмите)

Обита́я Ио́на в преиспо́дних морски́х, / приити́ моля́шеся и бу́рю утоли́ти; / унзе́н же аз муча́щаго стрело́ю, / Христу́ воспева́ю, зол губи́телю, / ско́ро приити́ Тебе́ к мое́й ле́ности. Видео-иллюстрация (нажмите)

Креста:

О́браз Боже́ственнаго Креста́ / Ио́на во чре́ве ки́тове просте́ртыма дла́нма проначерта́ / и взира́ше, спасе́н от зве́ря си́лою Твое́ю, Сло́ве. Видео-иллюстрация (нажмите)

Пасхи:

Снизше́л еси́ в преиспо́дняя земли́ / и сокруши́л еси́ вереи́ ве́чныя, содержа́щия свя́занныя, Христе́, / и тридне́вен, я́ко от ки́та Ио́на, воскре́сл еси́ от Гро́ба. Видео-иллюстрация (нажмите)

Фомы:

Проро́ка спасл еси́ от ки́та, Человеколю́бче, / и мене́ из глубины́ прегреше́ний / возведи́, молю́ся. Видео-иллюстрация (нажмите)

Успения Богородицы:

Морски́й пучиноро́дный ки́тов вну́тренний огнь – / тридне́внаго Твоего́ погребе́ния проображе́ние, / его́же Ио́на проро́к показа́ся. / Спасе́н бо, я́ко и предпосла́ся, неврежде́н, вопия́ше: / пожру́ Ти со гла́сом хвале́ния, Го́споди. Видео-иллюстрация (нажмите)

Осмогласника и Введения:

Проро́ка Ио́ну подража́я, вопию́: / живо́т мой, Бла́же, свободи́ из тли / и спаси́ мя, Спа́се ми́ра, зову́ща: сла́ва Тебе́. Видео-иллюстрация (нажмите)

Из глубины́ в ско́рби вопия́ше: / возведи́ от тли живо́т мой,– / проро́к Ио́на к Тебе́, Человеколю́бцу. Видео-иллюстрация (нажмите)

И́же в по́нте подъе́мый злоключе́ние / убеже́нием бу́ри и метне́нием жре́бия / и усты́ ят быв морска́го зве́ря, невреди́мь пребы́в, / но вопия́ше Ио́на к Тебе́: / живо́т мой да взы́дет, Христе́. Видео-иллюстрация (нажмите)

Отве́ргл мя еси́ во глубины́ се́рдца морска́го, / и спасл еси́ мя, Спа́се, от рабо́ты сме́ртныя, / и разреши́л еси́ у́зы беззако́ний мои́х. Видео-иллюстрация (нажмите)

Я́ко Ио́ну проро́ка, возведи́, Христе́ Бо́же, живо́т мой от тли, / вопию́ Ти, Человеколю́бче, / я́ко жизнь у тебе́ есть, и нетле́ние, и си́ла. Видео-иллюстрация (нажмите)

Со Ио́ною вопие́м Ти, Го́споди, / со гла́сом хвале́ния моля́щеся: / возведи́ от тли живо́т наш. Видео-иллюстрация (нажмите)

Весь от страсте́й безме́рных содержу́ся и ки́том зол снизпадо́х, / но возведи́ из истле́ния мя, Бо́же, я́ко же пре́жде Ио́ну, / и ве́рою безстра́стие ми да́руй, / я́ко да во гла́се хвале́ния и спасе́ния ду́хом пожру́ Ти. Видео-иллюстрация (нажмите)

Я́ко во глубины́ морски́я отве́ргся и углебо́х в тиме́нии глубины́, / от отча́яния у́мныя зимы́, ле́ности моея́, Христе́, изми́ мя, / я́ко Ио́ну от зве́ря. Видео-иллюстрация (нажмите)

Песнь 7

Тебе́, у́мную, Богоро́дице, пещь, / разсмотря́ем, ве́рнии, / я́коже бо о́троки спасе́ три Превозноси́мый, / мир обнови́, во чре́ве Твое́м всеце́л, / хва́льный отце́в Бог и препросла́влен. Видео-иллюстрация (нажмите)

Я́ко о́троцы дре́вле, зове́м Тебе́, Сло́ве: / бу́ди Твои́х рабо́в, Спа́се, храни́тель и покро́в / и спаси́ вся от прило́га сопроти́внаго, / я́ко да, пою́ще Твое́ Рождество́, / во ве́ки, глаго́лем, благослове́н еси́. Видео-иллюстрация (нажмите)

В Рождество Христово:

О́троцы, благоче́стию совоспита́ни, / злочести́ваго веле́ния небре́гше, / о́гненнаго преще́ния не убоя́шася, / но, посреди́ пла́мене стоя́ще, поя́ху: / отце́в Бо́же, благослове́н еси́. Видео-иллюстрация (нажмите)

Всецаря́ любо́вию уловле́ннии, о́троцы / укори́ша безчи́сленно яря́щася мучи́теля злобо́жное языковре́дие, / и́мже повину́ся огнь мно́гий, / Влады́це глаго́лющим: / во ве́ки благослове́н еси́. Видео-иллюстрация (нажмите)

Креста:

Из пла́мене о́троки избавле́й, / плоть прии́м, прише́л еси́ на зе́млю / и, на Кресте́ пригвожде́н, спасе́ние нам дарова́л еси́, Христе́, / еди́н благослове́н, отце́в Бо́же, / и препросла́влен. Видео-иллюстрация (нажмите)

Пасхи:

О́троки от пе́щи изба́вивый, / быв Челове́к, стра́ждет, я́ко сме́ртен, / и стра́стию сме́ртное в нетле́ния облачи́т благоле́пие, / еди́н благослове́н отце́в Бог и препросла́влен. Видео-иллюстрация (нажмите)

Фомы:

О́бразу служи́ти мусики́йскому согла́сию созыва́ющу лю́ди, / от пе́сней сио́нских пою́ще оте́чески, о́троцы Дави́довы мучи́телево разори́ша злочести́вое веле́ние / и пла́мень в ро́су преложи́ша, песнь воспева́юще: / превозноси́мый отце́в и наш Бо́же, благослове́н еси́. Видео-иллюстрация (нажмите)

Успения Богородицы:

Безсту́дней я́рости же и огню́ / Боже́ственное жела́ние сопротивля́яся, / огнь у́бо ороша́ше, я́рости же смея́шеся, / Богодохнове́нною слове́сною преподо́бных тривеща́нною цевни́цею / противовеща́я мусики́йским орга́ном посреди́ пла́мене: / препросла́вленный отце́в и наш Бо́же, благослове́н еси́. Видео-иллюстрация (нажмите)

Осмогласника:

Су́щим в пещи́ отроко́м Твои́м, Спа́се, / не прикосну́ся, ниже́ стужи́, огнь. / Тогда́ трие́, я́ко еди́неми усты́, поя́ху / и благословля́ху, глаго́люще: / благослове́н Бог оте́ц на́ших. Видео-иллюстрация (нажмите)

Проидо́ша, я́ко черто́г, пе́щный пла́мень нестерпи́мый / и́же за благоче́стие иногда́ / о́троцы святи́и, показа́вшеся я́ве, / и, согла́сно воспева́юще, песнь поя́ху: / отце́в Бо́же, благослове́н еси́. Видео-иллюстрация (нажмите)

Авраа́мстии о́троцы в пещи́, / Тро́ицу прообрази́вше, / оѓненный пла́мень на ро́су преложи́ша / и, пою́ще, вопия́ху: / благослове́н еси́, Бо́же оте́ц на́ших. Видео-иллюстрация (нажмите)

Введения:

Пещь, Спа́се, ороша́шеся, / о́троцы же, лику́юще, поя́ху: / отце́в Бо́же, благослове́н еси́. Видео-иллюстрация (нажмите)

В гремя́щую пещь сни́де А́нгел Госпо́день / к су́щим о Аза́рии отроко́м, / и не прикосну́ся их отню́д огнь. / Тогда́ трие́, воспева́юще, глаго́лаху: / благослове́н еси́, Бо́же оте́ц на́ших. Видео-иллюстрация (нажмите)

Явле́йся в купине́ законополо́жнику огне́м / и рождество́ Де́вы проображе́й в ней, / благослове́н еси́, Го́споди, Бо́же оте́ц на́ших. Видео-иллюстрация (нажмите)

Вся дела́ Твоя́ и́стинна / и пра́ви путие́ Твои́, / Бо́же оте́ц на́ших. Видео-иллюстрация (нажмите)

По мно́жеству ми́лости Твоея́, / Человеколю́бче, сотвори́ с на́ми, / да Тебе́ ве́рно вси, воспева́юще, пои́м, / я́коже о́троцы: / благослове́н еси́, Бо́же оте́ц на́ших. Видео-иллюстрация (нажмите)

Песнь 8

В пещи́ о́троцы Изра́илевы, / я́коже в горни́ле, / добро́ тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, / по́йте и превозноси́те во вся ве́ки. Видео-иллюстрация (нажмите)

Новоде́телю всего́ ми́ра и Спаси́телю, / пое́т Тя вся со А́нгелы тварь, / игра́ет, лику́ет и ра́дуется тре́петом: / благослови́те, глаго́лющи, / вся дела́, честно́е рождество́ Изба́вителя моего́, / со мно́ю во ве́ки / любо́вию превознося́щая. Видео-иллюстрация (нажмите)

В Рождество Христово:

Чу́да преесте́ственнаго / росода́тельная изобрази́ пещь о́браз: / не бо, я́же прия́т, пали́т ю́ныя, / я́ко ниже́ огнь Божества́ Де́вы, / в Ню́же вни́де утро́бу. / Тем, воспева́юще, воспое́м: / да благослови́т тварь вся Го́спода и превозно́сит во вся ве́ки. Видео-иллюстрация (нажмите)

Утро́бу неопа́льно образу́ют Отрокови́цы / и́же в Ве́тсем опаляя́емии ю́ноши, / преесте́ственно ражда́ющую запечатле́нну. / Обоя́ же, содева́ющи чудо де́йство еди́но, / лю́ди к пе́нию возставля́ет благода́ть. Видео-иллюстрация (нажмите)

Креста:

Ру́це, в ров ве́рженный львов, / иногда́ вели́кий во проро́цех / крестообра́зно просте́р Дании́л, / неврежде́н от сих сне́ди спасе́ся, / благословя́ Христа́ Бо́га во ве́ки. Видео-иллюстрация (нажмите)

Пасхи:

Сей нарече́нный и Святы́й День – / еди́н суббо́т царь и госпо́дь, / пра́здников пра́здник / и торжество́ есть торже́ств, / в о́ньже благослови́м Христа́ во ве́ки. Видео-иллюстрация (нажмите)

Фомы:

В пла́мени о́гненне горя́щия пе́щи / сохра́ншаго де́ти / и во зра́це А́нгела снизше́дшаго к ним, / по́йте Го́спода / и превозноси́те Его́ во ве́ки. Видео-иллюстрация (нажмите)

Успения Богородицы:

Пла́мень ороша́ющ преподо́бныя, / злочести́выя же попаля́ющ, / А́нгел Бо́жий всемо́щный показа́ отроко́м, / живонача́льный же исто́чник соде́ла Богоро́дицу, / тлю сме́рти и живо́т точа́щу пою́щим: / Соде́теля еди́наго пои́м, изба́вленнии, / и превозно́сим во вся ве́ки. Видео-иллюстрация (нажмите)

Осмогласника:

Песносло́вцы в пещи́ спа́сшаго де́ти / и громопла́менную прело́жшаго на ро́су, / Христа́ Бо́га по́йте и превозноси́те во вся ве́ки. Видео-иллюстрация (нажмите)

Песнь Тебе́ прино́сим Безпло́тных, / я́коже о́троцы в пещи́, и, пою́ще, глаго́лем: / благослови́те, вся дела́ Госпо́дня, Го́спода. Видео-иллюстрация (нажмите)

Песнопе́вцы пещь дре́вле о́троки прие́мши, неопа́льны сохрани́, / посреде́ же пла́мене стоя́щия согла́сно пе́ти научи́: / благослови́те, вся дела́ Госпо́дня, Го́спода. Видео-иллюстрация (нажмите)

И́же пи́щею не оскве́рншиися о́троцы от ца́рския трапе́зы, / во огнь, ра́дующеся, внидо́ша не́когда / и, в пла́мени прохлажда́еми, / усе́рдно поя́ху: /благослови́те, дела́ Госпо́дня, Го́спода. Видео-иллюстрация (нажмите)

Небеса́ небе́с и вода́, я́же превы́ше небе́с, / благослови́те, по́йте Го́спода / и превозноси́те Его́ во ве́ки. Видео-иллюстрация (нажмите)

Введения:

Его́же ужаса́ются А́нгели и вся во́инства, / я́ко Творца́ и Го́спода, / по́йте, свяще́нницы, просла́ви те, о́троцы, / благослови́те, лю́дие, / и превозноси́те во вся ве́ки. Видео-иллюстрация (нажмите)

Пою́т Тя во́и А́нгельстии, сла́вит Тя род челове́ческий, / свяще́нницы, раби́ и ду́ши пра́ведных, / я́ко Творца́ и Го́спода всех во ве́ки. Видео-иллюстрация (нажмите)

Трисве́тлое Существо́ и Трисо́лнечная сла́ва / сни́де отроко́м посреде́ огня́, / сия́ невреди́мы соблюда́ющи / и Воскресе́ние нам предвозвеща́ющи / Христа́ Бо́га на́шего, / Его́же пою́т Ангели и мно́жества, / я́ко Победи́теля сме́рти во ве́ки. Видео-иллюстрация (нажмите)

Прему́дростию и Сло́вом вся соста́вльшаго Бо́га, / от язы́ков и ва́рваров изба́вльшаго нас, / о́троцы, по́йте, / свяще́н ницы, просла́вите, / лю́дие, превозноси́те во вся ве́ки. Видео-иллюстрация (нажмите)

На Сина́и купину́ горя́щу / неопа́льну сохра́ншаго / и о́троки посреде́ горя́щаго пла́мене изба́вльшаго Бога, / по́йте, благослови́те / и превозноси́те Его́ во ве́ки. Видео-иллюстрация (нажмите)

Прему́дростию Небеса́ утверди́вшаго, / и на вода́х зе́млю основа́вшаго, / и тварь всю созда́вшаго, / благослови́те, по́йте, свяще́нницы, Го́спода, / лю́дие, превозноси́те Его́ во вся ве́ки. Видео-иллюстрация (нажмите)

Царя́ сла́вы и Победи́теля сме́рти, / Иису́са Назоре́я, / Того́ превозноси́те во вся ве́ки. Видео-иллюстрация (нажмите)

Песнь Ана́ниеву Безнача́льному вси Отцу́ и Бо́гу, / моли́тву Аза́риеву Собезнача́льному Сло́ву, Сы́ну О́тчу, / и Мисаи́лову песнь Боже́ственному Ду́ху и Соприсносу́щному / правосла́вною ве́рою принесе́м, лю́дие, / во спасе́ние на́ше. Видео-иллюстрация (нажмите)

Чу́да преесте́ственнаго / показа́ о́браз огнеро́сная пещь дре́вле, / огнь бо не опали́ ю́ныя де́ти, / Христо́во явля́я безсе́менное от Де́вы Боже́ственное рождество́. / Тем, воспева́юще, воспои́м: / да благослови́т тварь вся Го́спода / и превозно́сит во вся ве́ки. Видео-иллюстрация (нажмите)

Песнь 9

О́браз чи́стаго рождества́ Твоего́ / огнепали́мая купина́ показа́ неопа́льная; / и ны́не на нас напа́стей свире́пеющую угаси́ти, мо́лимся, пещь, / да Тя, Богоро́дице, / непреста́нно велича́ем. Видео-иллюстрация (нажмите)

Ра́дуйся, Пресвята́я Богоприе́мная Мари́е, / ра́дуйся, Пречи́стая, па́дших основа́ние: / в Тебе́ бо яви́ся днесь Влады́ка, / о, чудесе́! Обновля́яй истле́вшия / и к Све́ту возводя́ невече́рнему, Отрокови́це. Видео-иллюстрация (нажмите)

В Рождество Христово:

Та́инство стра́нное ви́жу и пресла́вное: / Не́бо – верте́п, Престо́л Херуви́мский – Де́ву, / я́сли – вмести́лище, / в ни́хже возлеже́ Невмести́мый – Христо́с Бог, / Его́же, воспева́юще, велича́ем. Видео-иллюстрация (нажмите)

Люби́ти у́бо нам я́ко безбе́дное стра́хом / удо́бее молча́ние, / любо́вию же, Де́во, / пе́сни тка́ти, спротяже́н но сложе́нныя, / неудо́бно есть; / но и, Ма́ти, си́лу, / ели́ко есть произволе́ние, даждь. Видео-иллюстрация (нажмите)

Креста:

О Ма́ти, Де́во / и Богоро́дице нело́жная, / ро́ждшая безсе́менно Христа́ Бо́га на́шего, / на Крест возне́сшагося пло́тию. / Тя, ве́рнии вси, досто́йно с Ним ны́не велича́ем. Видео-иллюстрация (нажмите)

Пасхи:

Свети́ся, свети́ся, / Но́вый Иерусали́ме, / сла́ва бо Госпо́дня / на тебе́ возсия́, / лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́. Видео-иллюстрация (нажмите)

Фомы:

Тебе́, све́тлую свещу́ и Ма́терь Бо́жию, / пречу́дную сла́ву и вы́шшую всех тва́рей, / пе́сньми велича́ем. Видео-иллюстрация (нажмите)

Успения Богородицы:

Побежда́ются естества́ уста́вы / в Тебе́, Де́во Чи́стая, / де́вствует бо рождество́ и живо́т предобруча́ет смерть: / по рождестве́ Де́ва и по сме́рти жива́, / спаса́еши при́сно, Богоро́дице, насле́дие Твое́. Видео-иллюстрация (нажмите)

Осмогласника и Введения:

Светоно́сный о́блак, в о́ньже всех Влады́ка, / я́ко дождь с небесе́ на руно́, сни́де / и воплоти́ся нас ра́ди, / быв Челове́к, Безнача́льный, / велича́ем вси я́ко Ма́терь Бо́га на́шего Чи́стую. Видео-иллюстрация (нажмите)

Неизглаго́ланное Де́вы та́инство: / Не́бо возсия́, и Престо́л Херуви́мский / и светоно́сный черто́г показа́ся / Христа́ Бо́га Вседержи́теля. / Сию́ благоче́стно я́ко Богоро́дицу велича́ем. Видео-иллюстрация (нажмите)

Тя, ю́же ви́де Моисе́й, неопали́мую купину́, / и ле́ствицу одушевле́нную, / ю́же Иа́ков ви́де, / и дверь Небе́сную, е́юже про́йде Христо́с Бог наш, / пе́сньми, Ма́ти Чи́стая, велича́ем. Видео-иллюстрация (нажмите)

И́же вы́шнюю глубину́ Боже́ственнаго непостиже́ния / благоче́стно отве́рз, / ум, я́ко из ка́мене необъе́млемыя / Богонача́льныя возвы́сил еси́ Тро́ицы, всеблаже́нне о́тче, / тя велича́ем. Видео-иллюстрация (нажмите)

Ра́дуйся, Богоро́дице Де́во, Ма́ти благослове́нная, / из Тебе́ бо про́йде Бог воплоще́нный, / Сего́, сла́вяще и воспева́юще, велича́ем. Видео-иллюстрация (нажмите)

Ты вмести́лище, Чи́стая, Боже́ственнаго непостиже́ния / па́че естества́ была́ еси́, я́ко Бо́гу плоть взаимода́вшая / и Твою́ де́вственную не растерза́вшая утро́бу, / внегда́ роди́ти безсе́менно: / Тя велича́ем. Видео-иллюстрация (нажмите)

Сотвори́ держа́ву мы́шцею Свое́ю, / низложи́ бо си́льныя со престо́л / и вознесе́ смире́нныя Бог Изра́илев, / в ни́хже посети́ нас Восто́к с высоты́ / и напра́вил ны есть на путь ми́ра. Видео-иллюстрация (нажмите)

Тя, без ма́тере пе́рвее / и без отца́ второ́е, я́ко Бо́га и Челове́ка / пе́сньми велича́ем. Видео-иллюстрация (нажмите)

Живоприе́мный исто́чник приснотеку́щий, / светоно́сный свети́льник благода́ти, / храм одушевле́нный, сень пречи́стую, / Небесе́ и земли́ простра́ннейшую, / Богоро́дицу, ве́рнии, велича́ем. Видео-иллюстрация (нажмите)

Тебе́, ви́денную дверь Иезекии́лем проро́ком, / е́юже никто́же про́йде, то́кмо Бог еди́н, / Богоро́дице Де́во, пе́сньми почита́ем. Видео-иллюстрация (нажмите)

Ра́дуйся, де́вственная похвало́, / ра́дуйся, Ма́ти Пречи́стая, / Ю́же, вся тварь, Боже́ственными пе́сньми велича́ем. Видео-иллюстрация (нажмите)

Служи́тель безпло́тный предста́, глаго́ля Благода́тней: / Госпо́дь с Тобо́ю! / Ю́же велича́ем. Видео-иллюстрация (нажмите)

Тя, в ря́сны златы́я оде́янную, / укра́шенную Богоро́дицу, голуби́цу посре́бренную / и позлаще́нную блеща́нием зла́та, велича́ем. Видео-иллюстрация (нажмите)

Тя, го́ру Бо́жию усыре́нную, / в не́йже благоволи́ Бог пло́тию всели́тися, / Богоро́дице Мари́е, велича́ем. Видео-иллюстрация (нажмите)

Тебе́, Небе́с вы́шшую / и на земли́ Не́бо и Престо́л бы́вшую, Ма́терь Бо́жию, / вси ро́ди, велича́ем. Видео-иллюстрация (нажмите)

Серафи́мски, приглаша́юще, вопие́м Ти, Богоро́дице, ве́рнии: / Тобо́ю возвели́чи Госпо́дь, / е́же сотвори́ти с на́ми. / Тем Тя, Чи́стая, / и от Тебе́ неискусому́жно воплоще́ннаго Спа́са, / я́ко Бо́га всех, пе́сньми велича́ем. Видео-иллюстрация (нажмите)

Неизглаго́ланна Де́вы та́йна: / Его́же бо не вмести́ша горе́ Небе́сная вели́чествия, / вмеща́ется во утро́бу. / Те́мже, соше́дшеся, ублажа́ем Ю / и с ве́рою и весе́лием велича́ем. Видео-иллюстрация (нажмите)